We sztwortek, 20 marca, platforma Silling.org sztartła ślōnsko wersyjo gry Wordle pod mianym Literōwka. Jeji autōr je Grzegorz Kulik, ślōnski tumacz i przewodniczōncy Rady Ślōnskigo Jynzyka.
Grocze majōm sześ prōb na ôdgodniyńcie piyńcioliterowyj parole na bazie podpowiedzi we formie farbistych platek, co skazujōm noleżyte litery i jejich rozkłod. Dziynnie ô pōłnocy laduje sie nowo parola, co do wszyskich je tako sama.
Tak jak we angelskij wersyji dalsze litery idzie ôdkrywać ze pōmocōm ôdmiynianych słōw, tōż bez przikłod: „robiã”, „dōmku”, „dobre” idzie użyć we grze, możliwe ale rozwiōnzania sōm ino podstawowe formy, tōż „robić”, „dōmek”, „dobry” itd. Gra poznowo 11064 słowa, a możliwych rozwiōnzań je 1170.
We porownaniu ze ôryginałym nowość je zintegrowany słownik. We postrzodku gry idzie podyjzdrzeć znaczynia ôd słōw ze grupy rozwiōnzań. Sō przistympne definicyje ze sześciu naukowych i popularnonaukowych słownikōw: „Der Wortschatz der polnischen Mundart von Sankt Annaberg” ôd Reinholda Olescha, rynkopiśmiynnego „Narzecza śląskie. Słownik” ôd Michała Przywary, „Słownika Starych Siołkowic w powiecie opolskim” ôd Alfreda Zaręby, „Słownictwo Dzierżysławic w powiecie prudnickim” ôd Feliksa Pluty, „Małego słownika gwary Górnego Śląska” ôd Bożeny Cząstki-Szymon oraz internetowego „SileSłownika” ôd Grzegorza Kulika.
Literōwka je dalszo inicyjatywa we rōmach platformy Silling, co jeji cwek je szyrzynie wiedze na tymat ślōnskigo jynzyka, ale piyrszo, co prōbuje to robić bez szpas. Do teroz na internetowyj strōnie ôd projektu uprzistympniōne były m.in.: korpus ślōnskigo jynzyka, maszinowy tumacz polsko-ślōnski, ślōnske słowniki abo bibliotyczka lektur. Ône wszyske sōm ôpublikowane we ôtwartym przistympie.
Autōr ôd gry mo nadzieja, że ôna sie prziczyni niy ino do rozszyrzynio ślōnskigo słownictwa ôd groczōw, ale pōmoże budować społeczności ôsōb, co bydōm społym rozwiōnzować dalsze hasła tak we wirtualnym świecie jak tyż rzeczywistym.
Literōwka je przistympno pod adresōm: https://literowka.silling.org/
Bez szpas ku wiedzy – nowe norzyńdzie do nauki ślōnskigo jynzyka